Útlán 1,3 milljarðar í janúar

Heildarútlán Íbúðalánasjóðs námu tæpum 1,3 milljörðum króna í janúar en þar af voru rúmir 1,1 milljarður króna vegna almennra lána. Til samanburðar námu almenn útlán í janúar 2011 tæpum 1,4 milljarði króna. Meðalútlán almennra lána voru um 9,2 milljónir króna í janúar.

Þann 16. janúar síðastliðinn fór fram útboð íbúðabréfa og bárust gild tilboð að nafnvirði 12,555 milljarðar króna sem samsvarar um 20,557 milljörðum króna að markaðsvirði. Ákveðið var að taka tilboðum í eftirtalin íbúðabréf: HFF150444 að nafnvirði 3,310 milljarðar króna (5,790 milljarðar króna að markaðsvirði), vegin ávöxtunarkrafa án þóknunar 2,57%.
Uppgjörsdagur viðskiptanna var 23. janúar 2012 og vegin heildarávöxtunarkrafa tekinna tilboða án þóknunar var 2,57% og 2,58% með þóknun.

Vaxtaákvörðun Íbúðalánasjóðs byggir á ávöxtunarkröfu í útboði íbúðabréfanna ásamt vegnum fjármagnskostnaði uppgreiðslna ÍLS-veðbréfa. Vaxtaálag vegna rekstrar er 0,45%, vegna útlánaáhættu 0,45% og vegna uppgreiðsluáhættu 0,50%. Vegnir vextir í útboðinu og uppgreiddra ÍLS-bréfa eru nú 3,31% og í kjölfar útboðsins lækkuðu útlánavextir sjóðsins því um 20 punkta og standa nú í 4,20% með uppgreiðsluákvæði og 4,70% án uppgreiðsluákvæðis. Hin nýja vaxtaákvörðun tók gildi þann 17. janúar síðastliðinn.

Ávöxtunarkrafa á HFF24, HFF34 og HFF44 lækkaði í janúar og nam lækkunin 8-35 punktum eftir flokkum. Ávöxtunarkrafa HFF14 lækkaði um 221 punkta.

Heildarvelta íbúðabréfa nam um 88 milljörðum króna í janúar samanborið við um 50 milljarða í desember 2011. Samtals velta Íbúða-, hús- og húsnæðisbréfa í Kauphöllinni í janúar nam um 104 milljörðum króna sem er 34% af heildarveltu með skuldabréf. Markaðsvirði þessara skuldabréfa nam um 680 milljörðum króna sem er um 37% af heildarmarkaðsvirði skuldabréfa skráð í Kauphöllinni.

Greiðslur Íbúðalánasjóðs vegna húsnæðisbréfa og annarra skuldbindinga námu tæpum 2,3 milljörðum króna í janúar. Uppgreiðslur í janúar námu um 1,4 milljarði króna.

Til baka