Útlán 1,3 milljarðar í desember

Heildarútlán Íbúðalánasjóðs námu tæpum 1,3 milljörðum króna í desember en þar af var tæpur 1,1 milljarður króna vegna almennra lána. Til samanburðar námu almenn útlán í desember 2010 rúmum 1,7 milljörðum króna. Útlán almennra lána á árinu 2011 voru samtals um 21,5 milljarðar króna og heildarútlán um 24 milljarðar króna. Á árinu 2010 voru útlán almennra lána samtals um 18,5 milljarðar króna og heildarútlán um 27 milljarðar króna. Meðalútlán almennra lána voru um 9,6 milljónir króna í desember 2011.

Útgáfuáætlun Íbúðalánasjóðs fyrir árið 2012 var gefin út 30. desember sl. Áætluð útgáfa íbúðabréfa er 24 - 29 milljarðar króna að nafnvirði sem samsvarar um 36 - 44 milljörðum að markaðsvirði. Gert er ráð fyrir að ný útlán nemi 23 - 31 milljarði króna. Áætlaðar greiðslur sjóðsins til lánardrottna eru 71 - 79 milljarðar króna og er stærstur hluti þeirra tilkominn vegna afborgana íbúðabréfa. Sjóðurinn mun fjármagna hluta fjárþarfar sinnar á árinu 2012 með sölu á markaðsverðbréfum í eigu sjóðsins og þá einna helst RIKS 30 0701. Gerir útgáfuáætlun sjóðsins ráð fyrir sölu markaðsverðbréfa að upphæð 7 - 9 milljarðar króna.

Þann 15. desember greindi matsfyrirtækið Moody´s frá því að það hefði staðfest lánshæfiseinkunn Íbúðalánasjóðs Baa3 með neikvæðum horfum. Horfur um lánshæfismat Íbúðalánasjóðs taka mið af horfum Moody´s á lánshæfismat ríkissjóðs Íslands.

Ávöxtunarkrafa á HFF24, HFF34 og HFF44 lækkaði í desember og nam lækkunin 7 - 12 punktum eftir flokkum. Ávöxtunarkrafa HFF14 lækkaði um 153 punkta. Ávöxtunarkrafa allra flokka lækkaði á árinu 2011. Ávöxtunarkrafa á HFF24, HFF34 og HFF44 lækkaði um 59 – 163 punkta eftir flokkum en ávöxtunarkrafa HFF14 lækkaði um 746 punkta.

Heildarvelta íbúðabréfa nam um 50 milljörðum króna í desember samanborið við um 67 milljarða í nóvember 2011. Heildarvelta íbúðabréfa á árinu 2011 nam um 685 milljörðum króna en um 876 milljörðum á árinu 2010. Hlutfall íbúðabréfa af veltu allra skuldabréfa í Kauphöllinni á árinu 2011 var um 26% en um 31% á árinu 2010.

Greiðslur Íbúðalánasjóðs vegna íbúðabréfa og annarra skuldbindinga námu rúmum 11,6 milljörðum króna í desember. Uppgreiðslur í desember námu um 1,2 milljörðum króna. Samtals námu uppgreiðslur á árinu 2011 um 9,8 milljörðum króna.

Til baka