Útlán um 1,7 milljarðar í nóvember

Heildarútlán Íbúðalánasjóðs námu tæpum 1,7 milljörðum króna í nóvember en þar af voru tæpir 1,3 milljarðar króna vegna almennra lána. Til samanburðar námu almenn útlán í nóvember 2010 tæpum 1,9 milljörðum króna. Meðalútlán almennra lána voru um 9,5 milljónir króna í nóvember. Heildarfjárhæð almennra lána fyrstu 11 mánuði ársins er samtals um 20,5 milljarðar króna en var um 16,8 milljarðar króna á sama tímabili 2010.
Ríkissjóður keypti til baka óverðtryggð bréf af Íbúðalánasjóði í flokki RIKH 18 1009 að andvirði 32,5 milljarðar kr. að nafnverði. Á móti afhendir ríkissjóður verðtryggð bréf í flokki RIKS 30 0701 fyrir 31,6 milljarða kr. Uppgjör á bréfunum átti sér stað 9. nóvember. Aðgerðin felur í sér að eiginfjárframlag ríkissjóðs inn í Íbúðalánasjóð breytist úr því að vera óverðtryggt í það að vera verðtryggt. Markmiðið með aðgerðinni er að draga úr verðtryggingaráhættu Íbúðalánasjóðs en megnið af skuldbindingum sjóðsins eru verðtryggðar. Aðgerðin mun hafa óveruleg áhrif á skuldastöðu ríkissjóðs.
Þann 24. nóvember greindi matsfyrirtækið Standard & Poor´s frá því að það hefði breytt horfum á lánshæfismati Íbúðalánasjóðs í stöðugar úr neikvæðum. Jafnframt voru staðfestar einkunnirnar BB/B fyrir skuldbindingar í erlendri mynt og BBB-/A-3 fyrir skuldbindingar í innlendri mynt. Breyting á horfum um lánshæfismat Íbúðalánasjóðs var gerð í kjölfar breytingar á horfum um lánshæfismat ríkissjóðs Íslands í stöðugar úr neikvæðum.
Ávöxtunarkrafa á HFF24, HFF34 og HFF44 lækkaði í nóvember og nam lækkunin 10-42 punktum eftir flokkum. Ávöxtunarkrafa HFF14 lækkaði um 88 punkta. Frá áramótum hefur ávöxtunarkrafa allra flokka íbúðabréfa lækkað um 52-150 punkta en lækkun ávöxtunarkröfu HFF14 nemur 593 punktum.
Í mánaðarskýrslu fyrir september var fjallað um hverjir væru eigendur íbúðabréfanna og eignarhluta. Þær upplýsingar voru ekki alveg réttar og hafa þær verið leiðréttar. Þann 30. júní sl. áttu lífeyrissjóðir 63,1% af útistandandi íbúðabréfum, verðbréfa- og fjárfestingasjóðir 11,8%, erlendir aðilar 5,9% og bankar og lánafyrirtæki 5,0%. Aðrir aðilar áttu því samtals um 14% af útistandandi íbúðabréfum sjóðsins. Í töflunni sést einnig staðan eins og hún var 30. september 2011.

Heildarvelta íbúðabréfa nam um 67 milljörðum króna í nóvember samanborið við um 61 milljarð í október 2011.
Greiðslur Íbúðalánasjóðs vegna íbúðabréfa og annarra skuldbindinga námu rúmum 600 milljónum króna í nóvember. Uppgreiðslur í nóvember námu um 1,1 milljarði króna.

Til baka