Útlán 1,5 milljarðar í október

Heildarútlán Íbúðalánasjóðs námu rúmum 1,5 milljörðum króna í október en þar af voru rúmir 1,4 milljarðar króna vegna almennra lána. Til samanburðar námu almenn útlán í október 2010 rúmum 2 milljörðum króna. Meðalútlán almennra lána voru um 9,2 milljónir króna í október. Heildarfjárhæð almennra lána fyrstu 10 mánuði ársins er samtals um 19,2 milljarðar króna en var um 14,9 milljarðar króna á sama tímabili 2010.
Þann 30. september síðastliðinn fór fram útboð íbúðabréfa og bárust gild tilboð að nafnvirði 6,4 milljarðar króna sem samsvarar um 9,8 milljörðum króna að markaðsvirði. Ákveðið var að taka tilboðum í eftirtalin íbúðabréf: HFF150434 að nafnvirði 1,1 milljarðar króna (1,6 milljarðar króna að markaðsvirði), vegin ávöxtunarkrafa án þóknunar 3,13%. HFF150644 að nafnvirði 2,8 milljarðar króna (4,5 milljarðar króna að markaðvirði), vegin ávöxtunarkrafa án þóknunar 3,21%.
Uppgjörsdagur viðskiptanna var 3. október 2011 og vegin heildarávöxtunarkrafa tekinna tilboða án þóknunar var 3,19% og 3,20% með þóknun. Vaxtaákvörðun Íbúðalánasjóðs byggir á ávöxtunarkröfu í útboði íbúðabréfanna ásamt vegnum fjármagnskostnaði uppgreiðslna ÍLS-veðbréfa. Vaxtaálag vegna rekstrar er 0,45%, vegna útlánaáhættu 0,45% og vegna uppgreiðsluáhættu 0,50%. Vegnir vextir í útboðinu og uppgreiddra ÍLS-bréfa eru 3,54% og haldast útlánavextir sjóðsins því óbreyttir að svo stöddu, 4,40% með uppgreiðsluákvæði og 4,90% án uppgreiðsluákvæðis.
Ávöxtunarkrafa á HFF24, HFF34 og HFF44 lækkaði í október og nam lækkunin 30-43 punktum eftir flokkum. Ávöxtunarkrafa HFF14 lækkaði um 139 punkta. Frá áramótum hefur ávöxtunarkrafa allra flokka íbúðabréfa lækkað um 42-109 punkta en lækkun ávöxtunarkröfu HFF14 nemur um 505 punktum.
Heildarvelta íbúðabréfa nam um 61 milljarði króna í október samanborið við um 47 milljarða í september 2011.
Greiðslur Íbúðalánasjóðs vegna íbúðabréfa og annarra skuldbindinga námu tæpum 8,4 milljörðum króna í október. Uppgreiðslur í október námu um 1,3 milljörðum króna.

Til baka