Útlán 2,1 milljarður í september

Heildarútlán Íbúðalánasjóðs námu rúmum 2,1 milljarði króna í september en þar af voru tæpir 1,9 milljarðar króna vegna almennra lána. Til samanburðar námu almenn útlán í september 2010 einnig tæpum 1,9 milljörðum króna. Meðalútlán almennra lána voru um 8,7 milljónir króna í september. Heildarfjárhæð almennra lána fyrstu 9 mánuði ársins er samtals um 17,7 milljarðar króna en var um 12,9 milljarðar króna á sama tímabili 2010.
Þann 30. september síðastliðinn ákvað sjóðurinn að efna til þriðja útboðs á íbúðabréfum á árinu 2011. Niðurstaða útboðsins var tilkynnt 3. október ásamt vaxtaákvörðun útlána.
Vísitala neysluverðs í september 2011 hækkaði um 0,63% frá fyrra mánuði (hækkaði um 0,75% án húsnæðis). Síðastliðna tólf mánuði hefur vísitala neysluverðs hækkað um 5,7% og vísitalan án húsnæðis um 5,5%. Undanfarna þrjá mánuði hefur vísitala neysluverðs hækkað um 1% sem jafngildir 4,1% verðbólgu á ári (3,6% verðbólgu fyrir vísitöluna án húsnæðis).
Alls veitti Íbúðalánasjóður 1.753 almenn íbúðalán fyrstu níu mánuði ársins í samanburði við 1.413 lán á sama tímabili í fyrra, sem er um 24 % aukning. Samkvæmt upplýsingum frá Þjóðskrá var samtals 3.937 kaupsamningum þinglýst á sama tímabili á árinu 2011 og 3.570 á árinu 2010 sem er um 10% aukning milli ára.
Ávöxtunarkrafa á HFF14, HFF34 og HFF44 lækkaði í september og nam lækkunin 2-120 punktum eftir flokkum. Ávöxtunarkrafa HFF24 hækkaði um 6 punkta. Frá áramótum hefur ávöxtunarkrafa allra flokka íbúðabréfa lækkað um 12-75 punkta en lækkun ávöxtunarkröfu HFF14 nemur um 366 punktum.
Fjármögnun sjóðsins samanstendur af íbúðabréfum og hús- og húsnæðisbréfum. Þann 30. júní sl. voru útistandandi íbúðabréf um 97% af heildarútistandandi fjármögnun sjóðsins á markaðsvirði. Taflan hér til hliðar sýnir eigendur íbúðabréfanna þann 30. júní.
Heildarvelta íbúðabréfa nam um 47 milljörðum króna í september samanborið við um 64 milljarða í ágúst 2011.
Greiðslur Íbúðalánasjóðs vegna íbúðabréfa og annarra skuldbindinga námu tæpum 7,3 milljörðum króna í september. Uppgreiðslur í september námu um 979 milljónum króna.

Til baka