Svar til Eftirlitsstofnunar EFTA (ESA)

Íbúðalánasjóður gegnir mikilvægu hlutverki á húsnæðismarkaði. Sjóðurinn verður áfram rekinn sem ein heild og öll starfsemin skilgreind sem þjónusta í almannaþágu. Þetta kemur fram í svari stjórnvalda við athugasemdum ESA en jafnframt að gerðar verði nauðsynlegar breytingar á lögum og reglum um sjóðinn þannig að starfsemin samræmist samningnum um evrópska efnahagssvæðið.
Eftirlitsstofnun EFTA (ESA) sendi íslenskum stjórnvöldum 18. júlí sl. sex tillögur að aðgerðum og breytingum á starfsemi Íbúðalánasjóðs svo hún samræmdist samningnum um evrópska efnahagssvæðið. Stjórnvöld hafa fjallað um tillögur ESA og komist að þeirri niðurstöðu að fallast megi á þær í meginatriðum. Miðað er við að Íbúðalánasjóður verði áfram rekinn sem ein heild þannig að starfsemi sjóðsins verði ekki skipt upp heldur verði öll starfsemi hans skilgreind sem þjónusta í almannaþágu. Sjóðurinn sinni ekki öðrum verkefnum en þeim sem falla að því hlutverki og starfi því ekki á samkeppnismarkaði. Lagt er til að lán frá Íbúðalánasjóði verði áfram takmörkuð við 20 milljónir króna og fari ekki yfir 80% af kaupverði eða byggingarkostnaði íbúðar. Lánveitingum verður hætt til byggingar íbúðarhúsnæðis þegar markmið lántakenda er að selja húsnæðið áfram til þriðja aðila. Íbúðalánasjóður mun áfram veita lán til leiguíbúða, en auknar kröfur verða gerðar til leigufélaganna.

Til baka