Útlán 2,2 millljarðar í júlí

Heildarútlán Íbúðalánasjóðs námu rúmum 2,2 milljörðum króna í júlí en þar af voru rúmir 2,1 milljarðar króna vegna almennra lána. Til samanburðar námu almenn útlán í júlí 2010 tæpum 1,8 milljörðum króna. Meðalútlán almennra lána voru um 9,9 milljónir króna í júlí en um 10 milljónir í júní síðastliðnum. Heildarfjárhæð almennra lána fyrstu 7 mánuði ársins er samtals um 13,5 milljarðar króna en var um 9,4 milljarðar króna á sama tímabili 2010.
Þann 29. júlí síðastliðinn fór fram útboð íbúðabréfa og bárust gild tilboð að nafnvirði 8,180 milljarðar króna. Ákveðið var að taka tilboðum í eftirtalin íbúðabréf: HFF150434 að nafnvirði 2,010 milljarðar króna, vegin ávöxtunarkrafa án þóknunar 3,24%. HFF150644 að nafnvirði 2,550 milljarðar króna, vegin ávöxtunarkrafa án þóknunar 3,32%.
Uppgjörsdagur viðskiptanna var 5. ágúst 2011 og vegin heildarávöxtunarkrafa tekinna tilboða án þóknunar var 3,28% og 3,30% með þóknun.
Vaxtaákvörðun Íbúðalánasjóðs byggir á ávöxtunarkröfu í útboði íbúðabréfanna ásamt vegnum fjármagnskostnaði uppgreiðslna ÍLS-veðbréfa. Vaxtaálag vegna rekstrar er 0,45%, vegna útlánaáhættu 0,45% og vegna uppgreiðsluáhættu 0,50%. Vegnir vextir í útboðinu og uppgreiddra ÍLS-bréfa eru 3,51% og haldast útlánavextir sjóðsins því óbreyttir að svo stöddu, 4,40% með uppgreiðsluákvæði og 4,90% án uppgreiðsluákvæðis.
Eftirlitsstofnun EFTA (ESA) fór fram á það við íslensk stjórnvöld að breytingar yrðu gerðar á Íbúðalánasjóði til að laga hann að ríkisaðstoðarreglum EES samningsins. Nú er unnið að breytingum á skipulagi og starfsemi sjóðsins til þess að samræma starfsemi hans reglum ESA. Nýja skipulagið þarf að ganga í gildi um næstu áramót.
Vísitala neysluverðs í júlí 2011 hækkaði um 0,11% frá fyrra mánuði (lækkaði um 0,22% án húsnæðis). Þá jókst kostnaður vegna eigin húsnæðis um 1,2%. Síðastliðna tólf mánuði hefur vísitala neysluverðs hækkað um 5,0% og vísitalan án húsnæðis um 4,7%. Undanfarna þrjá mánuði hefur vísitala neysluverðs hækkað um 1,6% sem jafngildir 6,3% verðbólgu á ári (4,2% verðbólgu fyrir vísitöluna án húsnæðis).
Ávöxtunarkrafa allra íbúðabréfa hækkaði í júlímánuði og nam hækkunin 3-12 punktum eftir flokkum.

Heildarvelta íbúðabréfa nam um 43,6 milljörðum króna í júlí samanborið við um 55,7 milljarða í júní 2011.
Greiðslur Íbúðalánasjóðs vegna húsbréfa og húsnæðisbréfa námu rúmum 380 milljónum króna í júlí. Uppgreiðslur í júlí námu um 900 milljónum króna.

Til baka