110% leiðin - mikill fjöldi umsókna

Umsóknarfrestur vegna 110% leiðar Íbúðalánasjóðs rann út á miðnætti þann 30. júní sl. Mikill fjöldi umsókna barst til Íbúðalánasjóðs og búast má við því að afgreiðsla taki allt að 3 mánuðum. Um 110 % leið er fjallað í lögum nr. 29/2011, http://www.althingi.is/altext/139/s/1147.html

Athygli skal vakin á því að almennt innheimtuferli er í gangi eftir sem áður. Ef vanskil eru á einu eða fleiri lánum er ekki hægt að gera ráð fyrir að þau greiðist upp með niðurfærslunni, einungis aftasta lánið er tekið og það klárað áður en byrjað er á því næsta. Upplýsingar um úrræði við greiðsluvanda má finna hér: http://www.ils.is/greidsluerfidleikar/

Við niðurfærslu skulda samkvæmt 110% leiðinni er byrjað á því láni sem er á aftasta veðrétti (að því tilskyldu að lánveitandi hafi verið aðili samkomulagsins), vanskil þess láns eru fyrst greidd með niðurfærslunni, síðan jöfnunarreikningur ef hann er til staðar og loks er greitt inn á lánið. Ekki er hægt að selja fasteigna á meðan umsókn um niðurfærslu er til meðferðar, þar sem þá er óvissa um stöðu áhvílandi lána.

Haft verður samband við umsækjanda ef gögn vantar í umsókn. Ef láðst hefur að senda fylgigögn með umsókn er hægt að senda þau á netfangið lanalaekkun@ils.is og setja í tilvísun EU00 númer umsóknarinnar. Einnig er hægt að senda gögn á faxnúmer 5696800.

Ef viðskiptavinur er ósáttur við afgreiðslu Íbúðalánasjóðs á erindi sínu getur hann snúið sér til úrskurðarnefndar félagsþjónustu- og húsnæðismála. Til nefndarinnar er unnt að skjóta ákvörðun félagsmálanefndar samkvæmt lögum um félagsþjónustu sveitarfélaga nr. 40/1991 og ákvörðun húsnæðisnefnda og Íbúðalánasjóðs samkvæmt lögum um húsnæðismál nr. 44/1998. Kærufrestur er þrír mánuðir frá því að aðila máls var tilkynnt um ákvörðun. Nefndin hefur aðstöðu í velferðarráðuneytinu, Hafnarhúsinu v/Tryggvagötu, 150 Reykjavík. Kæra til úrskurðarnefndar er kærendum að kostnaðarlausu.

Til baka