ESA leggur til breytingar á Íbúðalánasjóði

ESA hefur ákveðið að leggja til við íslensk stjórnvöld að breytingar verði gerðar á Íbúðalánasjóði til að laga hann að ríkisaðstoðarreglum EES samningsins. Ákvörðuninni skal komið í framkvæmd fyrir 1. janúar 2012.

Í frétt frá ESA um málið segir að Íbúðalánasjóður veiti almannaþjónustu með því að veita eintaklingum langtímalán til húsnæðiskaupa á viðráðanlegum kjörum. Auk þess veiti sjóðurinn sveitarfélögum, fyrirtækjum og samtökum lán til byggingar og kaupa á íbúðarhúsnæði sem ætlað er til útleigu.

Íbúðalánasjóður nýtur ríkisaðstoðar í formi ótakmarkaðrar ríkisábyrgðar, undanþágu frá tekjuskatti og niðurgreiddra vaxta til veitingar veðlána vegna leiguhúsnæðis. Þá er ekki gerð krafa um eðlilega arðsemi eiginfjár sjóðsins.

ESA telur að samkvæmt dómi EFTA dómstólsins frá 2006 beri íslenskum stjórnvöldum að skilgreina betur hlutverk Íbúðalánasjóðs í almannaþjónustu. Tryggja þurfi að þeirri ríkisaðstoð sem sjóðurinn nýtur sé einungis varið til starfsemi vegna almannaþjónustu, en ekki til starfsemi af viðskiptalegum toga.

ESA hefur af þessu tilefni lagt til að gripið verði til viðeigandi aðgerða til þess að laga starfsemi Íbúðalánasjóðs að ríkisaðstoðarreglum EES samningsins. Á meðal þess sem lagt er til við íslensk stjórnvöld er að þak verði sett á verð og stærð þess húsnæðis sem Íbúðalánasjóður fjármagnar. Tillögur ESA miða einnig að því að koma í veg fyrir að ívilnanir tengdar almannaþjónustu komi viðskiptahluta starfseminnar til góða.

Samþykki íslensk stjórnvöld tillögur ESA innan sex vikna og komi þeim í framkvæmd er málinu þar með lokið. Að öðrum kosti kann svo að fara að ESA hefji formlega rannsókn á grundvelli aðfinnslna sinna, segir í fréttatilkynningu ESA. 

Nú er unnið að breytingum á skipulagi og starfsemi Íbúðalánasjóðs til þess að samræma starfsemi sjóðsins ríkisstyrkjareglum ESA. Ef þær breytingar samræmast tillögum ESA er málið væntanlega úr sögunni. Nýja skipulagið þarf að ganga í gildi um næstu áramót.

Til baka