Heildarútlán 1,9 milljarðar í júní

Heildarútlán Íbúðalánasjóðs námu tæpum 1,9 milljörðum króna í júní en þar af voru rúmir 1,7 milljarðar króna vegna almennra lána. Til samanburðar námu almenn útlán í júní 2010 tæpum 1,6 milljörðum króna. Meðalútlán almennra lána voru um 10,3 milljónir króna í júní en um 10,5 milljónir í maí síðastliðnum. Heildarfjárhæð almennra lána fyrstu 6 mánuði ársins er samtals um 11,4 milljarðar króna en var um 7,6 milljarðar króna á sama tímabili 2010.
Þann 21. júní síðastliðinn voru samningar undirritaðir í tengslum við viðskiptavakt á eftirmarkaði og útgáfu íbúðabréfa. Markmið með samningum sem þessum er að styrkja aðgang Íbúðalánasjóðs að lánsfé og efla verðmyndun á eftirmarkaði. Frá 1. júlí 2011 hafa fimm fjármálastofnanir heimild til að kalla sig aðalmiðlara með íbúðabréf. Þær eru: Arion banki hf., Íslandsbanki hf., Landsbankinn hf., MP banki hf. og Saga Fjárfestingarbanki hf.
Endurskoðuð útgáfuáætlun Íbúðalánasjóðs fyrir árið 2011 var birt undir lok mánaðarins og er áætluð útgáfa íbúðabréfa sjóðsins fyrir síðari hluta ársins 2011 til fjármögnunar nýrra útlána og afborgana 14-18 milljarðar króna að nafnvirði en 20-26 milljarðar króna að markaðsvirði. Þá er áætlað að ný útlán á sama tímabili verði 12-16 milljarðar króna, þar af er gert ráð fyrir að lán til lögaðila nemi 2-3 milljörðum króna. Greiðslur vegna fjármögnunar sjóðsins eru áætlaðar 33-37 milljarðar króna síðari hluta árs.
Vísitala neysluverðs í júní 2011 hækkaði um 0,50% frá fyrra mánuði (hækkaði um 0,53% án húsnæðis). Síðastliðna tólf mánuði hefur vísitala neysluverðs hækkað um 4,2% og vísitalan án húsnæðis einnig um 4,2%. Undanfarna þrjá mánuði hefur vísitala neysluverðs hækkað um 2,2% sem jafngildir 9,2% verðbólgu á ári (7,9% verðbólgu fyrir vísitöluna án húsnæðis).
Ávöxtunarkrafa HFF 14 lækkaði í júní um 18 punkta frá fyrra mánuði og stendur í -0,77% í lok mánaðarins, ávöxtunarkrafa HFF 34 lækkaði um 3 punkta og stendur í 3,14%, og HFF 44 lækkaði um 6 punkta og stendur í 3,22%. Ávöxtunarkrafa HFF 24 hækkaði um 12 punkta og stendur í 2,56% í lok mánaðarins.

Heildarvelta íbúðabréfa nam um 55,7 milljörðum króna í júní samanborið við um 74 milljarða í maí 2011.
Greiðslur Íbúðalánasjóðs námu rúmum 11,2 milljörðum króna í júní, en þar af nam afborgun íbúðabréfa um 10,3 milljörðum króna. Uppgreiðslur í júní námu um 938 milljónum króna.


Til baka