Heildarútlán í maí tæpir 3 milljarðar

        Heildarútlán Íbúðalánasjóðs námu rúmum 2,9 milljörðum króna í maí, en þar af voru tæpir 2,7 milljarðar króna vegna almennra lána. Til samanburðar námu almenn útlán í maí 2010 rúmum 1,3 milljörðum króna. Meðalútlán almennra lána voru um 10,5 milljónir króna í maí en um 9,95 milljónir í apríl síðastliðnum. Heildarfjárhæð almennra lána fyrstu 5 mánuði ársins er samtals um 9,7 milljarðar króna en var um 6 milljarðar króna á sama tímabili 2010. 
        Þann 18. maí lækkaði matsfyrirtækið Standard & Poor´s lánshæfismat Íbúðalánasjóðs í BB með neikvæðum horfum í samræmi við lækkun lánshæfismats íslenska ríkisins fyrir innlendar skuldbindingar. Þá var sjóðurinn jafnframt tekinn af athugunarlista. 
        Vísitala neysluverðs í maí 2011 hækkaði um 0,94% frá fyrra mánuði (hækkaði um 0,73% án húsnæðis). Síðastliðna tólf mánuði hefur vísitala neysluverðs hækkað um 3,4% og vísitala án húsnæðis um 3,1%. Undanfarna þrjá mánuði hefur vísitala neysluverðs hækkað um 2,7% sem jafngildir 11,2% verðbólgu á ári og án húsnæðis er ársverðbólgan 10,3% 
        Ávöxtunarkrafa íbúðabréfa hækkaði í maí um 23–29 punkta eftir flokkum en HFF14 hækkaði um 43 punkta. 
        Heildarvelta íbúðabréfa nam um 74 milljörðum króna í maí samanborið við um 54 milljarða í apríl 2011. 
        Greiðslur Íbúðalánasjóðs námu rúmum 540 milljónum króna í maí. Uppgreiðslur í maí námu um 900 milljónum króna.

Til baka