78% vilja að Íbúðalánasjóður starfi áfram í óbreyttri mynd

Í könnun sem Capacent Gallup gerði nýlega fyrir Íbúðalánasjóð kom í ljós að 78,6 prósent þeirra sem svöruðu telja að Íbúðalánasjóður eigi að starfa áfram í óbreyttri mynd.
Alls segist 51% jákvæður í garð Íbúðalánasjóðs, þar af eru 12,9% mjög jákvæðir og 38,1% frekar jákvæðir. 9,3% eru frekar eða mjög neikvæðir gagnvart sjóðnum, en 39,7% hvorki neikvæðir né jákvæðir.
79,9% sögðust fyrst myndu leita til Íbúðalánasjóðs til að fjármagna kaupin ef þeir væru að kaupa húsnæði nú. 11,8% sögðust myndu leita fyrst til banka eða sparisjóða og 7,6% til lífeyrissjóða.
Spurt var hver hámarksfjárhæð húsnæðislána ætti að vera. Ef tekið er meðaltal svara í könnuninni er fjárhæðin 26,9 milljónir króna. Þá töldu menn að meðaltali eðlilegt að greiða 3% í vexti af verðtryggðum húsnæðislánum.
Einnig var spurt hve húsnæðislán ættu að vera hátt hlutfall af kaupverði íbúðar. Að meðaltali er það hlutfall 76,6% miðað við svör þeirra sem tóku þátt í könnuninni.
Spurt var hvaða tegund lána myndi henta best ef menn væru að taka húsnæðislán í dag. 54,2% sögðu það vera óverðtryggt íslenskt lán með föstum vöxtum. 25,6% svöruðu að það væri verðtryggt íslenskt lán, 17,1% völdu óverðtryggt íslenskt lán með breytilegum vöxtum, 1,8% völdu lán í erlendum gjaldmiðli með breytilegum vöxtum og 1,4% annars konar lán.
Þeir sem tóku þátt í könnuninni voru spurðir hvort þeir teldu líklegt eða ólíklegt að þeir stæðu frammi fyrir greiðsluerfiðleikum vegna afborgana af íbúðarhúsnæði á næstu mánuðum. 81,5% töldu ólíklegt að þeir lentu í greiðsluerfiðleikum næstu 3 - 6 mánuði. Athyglisvert er að þessi tala hefur hækkað mjög frá síðustu könnun sem gerð var haustið 2009, en þá töldu 66% aðspurðra ólíklegt að þeir lentu í greiðsluerfiðleikum.
Af þeim sem svöruðu í þessari könnun segjast 6,8% geta safnað talsverðu sparifé, 35,2% geta safnað svolitlu sparifé, 35,9% segja að endar nái saman með naumindum, 14,9% nota sparifé til að ná endum saman og 7,6% safna skuldum.
1499 manns á landinu öllu voru í úrtaki könnunarinnar, sem var gerð 4. til 13. apríl sl. 885 svöruðu og var svarhlutfall því 59 prósent.

Til baka