Útlán 2,1 milljarður í apríl

Heildarútlán Íbúðalánasjóðs námu tæpum 2,1 milljarði króna í apríl, en þar af voru tæpir 2 milljarðar króna vegna almennra lána. Til samanburðar námu almenn útlán í apríl 2010 tæpum 1,3 milljörðum króna. Meðalútlán almennra lána voru um 9,9 milljónir króna í apríl en um 10,0 milljónir í mars síðastliðnum.
Þann 14. apríl setti matsfyrirtækið Standard & Poor´s lánshæfismat Íbúðalánasjóðs á athugunarlista með neikvæðum horfum í samræmi við íslenska ríkið.
Vísitala neysluverðs í apríl 2011 hækkaði um 0,78% frá fyrra mánuði (hækkaði um 0,65% án húsnæðis). Kostnaður vegna eigin húsnæðis jókst um 1,4% sem hækkaði vísitöluna um 0,17%, aðallega vegna hærra markaðsverðs. Fyrstu þrjá mánuði þessa árs hefur vísitala íbúðaverðs á höfuðborgarsvæðinu hækkað um 2,2%, síðastliðna 6 mánuði hefur hún hækkað um 1,7% og síðustu 12 mánuðina um 1,9%.
Alls veitti Íbúðalánasjóður 709 ný íbúðalán fyrstu fjóra mánuði ársins í samanburði við 539 lán á sama tímabili í fyrra sem er 30% aukning. Fjöldi þinglýstra kaupsamninga á höfuðborgarsvæðinu í apríl var 337 (aðrar eignir en íbúðarhúsnæði ekki taldar með). Þegar apríl 2011 er borinn saman við apríl 2010 fjölgar kaupsamningum vegna fjölbýlis á höfuðborgarsvæðinu um 89% og vegna sérbýlis um 80%.
Ávöxtunarkrafa íbúðabréfa lækkaði í apríl um 6-21 punkta eftir flokkum en HFF14 lækkaði um 105 punkta.
Heildarvelta íbúðabréfa nam um 54,4 milljörðum króna í apríl samanborið við um 64,2 milljarða í mars 2011.
Greiðslur Íbúðalánasjóðs námu rúmum 8 milljörðum króna í apríl, en þar af nam afborgun íbúðabréfa um 7,6 milljörðum króna. Uppgreiðslur í apríl námu um 350 milljónum króna.
Til baka