Útlán 2,6 milljarðar í mars

Heildarútlán Íbúðalánasjóðs námu tæpum 2,6 milljörðum króna í mars, en þar af voru tæpir 2,3 milljarðar króna vegna almennra lána. Til samanburðar námu almenn útlán í mars 2010 tæpum 1,8 milljörðum króna. Meðalútlán almennra lána voru um 10 milljónir króna í mars en um 10,4 milljónir í febrúar síðastliðnum.



Hinn 10. mars hélt Íbúðalánasjóður sitt fyrsta útboð íbúðabréfa á árinu 2011. Alls bárust gild tilboð að nafnvirði 7,396 milljarða króna og ákveðið var að taka tilboðum að nafnvirði 2,707 milljarða króna í HFF34 á meðalávöxtunarkröfunni 3,16% án þóknunar og 2,776 milljarða króna í HFF44 á meðalávöxtunarkröfunni 3,24% án þóknunar. Vegin heildarávöxtunarkrafa tekinna tilboða án þóknunar var 3,20% og 3,22% með þóknun. Íbúðalánasjóður ákvað í kjölfar útboðsins að lækka útlánavexti og eru þeir því 4,40% með uppgreiðsluákvæði og 4,90% án uppgreiðsluákvæðis, en ákvörðunin tók gildi 11. mars sl.



ESA samþykkti 16. mars með fyrirvara 33 milljarða króna framlag íslenska ríkisins til Íbúðalánasjóðs með því skilyrði að nákvæm áætlun um endurskipulagningu í félagslegt og samkeppnislegt hlutverk sjóðsins liggi fyrir í lok september 2011.



Ársreikningur Íbúðalánasjóðs fyrir árið 2010 var birtur 31. mars. Tap varð af rekstri sjóðsins á árinu að fjárhæð 34,5 milljarðar kr. samkvæmt rekstrarreikningi og skýrist það fyrst og fremst af virðisrýrnun útlána. Eigið fé sjóðsins í lok ársins nam 8,6 milljörðum kr. samkvæmt efnahagsreikningi. Eiginfjárhlutfall sjóðsins sem reiknað er samkvæmt ákvæðum í reglugerð nr. 544/2004 um Íbúðalánasjóð var 2,2% í árslok og er hlutfallið reiknað með sama hætti og eiginfjárhlutfall fjármálafyrirtækja. Vanskil jukust á árinu og voru 6,5% lántakenda sjóðsins með einn eða fleiri gjalddaga í vanskilum í lok ársins samanborið við 5,3% lántakenda í árslok 2009. Á árinu leysti sjóðurinn til sín 854 íbúðir til fullnustu krafna og seldi 132 íbúðir. Í eigu sjóðsins voru 1.069 íbúðir í lok árs 2010 og hafði þeim fjölgað um 722 á árinu. Tæplega þriðjungur þessara eigna er í útleigu. 



Heildarvelta íbúðabréfa nam um 64,3 milljörðum króna í mars samanborið við um 53,5 milljarða í febrúar 2011.



Greiðslur Íbúðalánasjóðs námu rúmum 7,058 milljörðum króna í mars, en þar af var afborgun íbúðabréfa um 6,6 milljarðar króna. Uppgreiðslur í mars námu um 1,5 milljarði króna.










Til baka