Um 90% uppboðsbeiðna Íbúðalánasjóðs vegna tómra íbúða í eigu fyrirtækja

Íbúðalánasjóður hefur ekki gengið fram af óbilgirni gagnvart fjölskyldum í greiðsluvanda með því að krefjast nauðungarsölu á íbúðum vegna langvarandi vanskila eigenda sem ekki hafa náð samkomulagi um greiðsluerfiðleikaaðstoð, en slíks misskilnings hefur gætt í kjölfar fjölmiðlaumfjöllunar undanfarið. Benda má á að um 90% uppboðseigna Íbúðalánasjóðs í nýliðinni viku voru vegna tómra íbúða í eigu fyrirtækja.
    Vegna fjölmiðlaumfjöllunar undanfarið vill Íbúðalánasjóður koma eftirfarandi staðreyndum á framfæri:
    Íbúðalánasjóður var aðili að 54 nauðungarsölum í liðinni viku eða dagana 18.-22.október.
    Þar af voru 89% vegna íbúða í eigu lögaðila en einungis 11% í eigu einstaklinga eða fjölskyldna.
    Af 54 nauðungarsölum voru 44 vegna auðra íbúða í byggingu og í eigu lögaðila. Að auki voru 4 íbúðir í eigu lögaðila. Einungis 6 íbúðir voru í eigu einstaklinga og fjölskyldna.
    Íbúðalánasjóður leitast ætíð við að komast hjá uppboði á eignum einstaklinga og fjölskyldna svo fremi sem viðkomandi leiti til sjóðsins um möguleg úrræði um greiðsluerfiðleikaaðstoð og frestun uppboða.
    Lán Íbúðalánasjóðs eru yfirleitt á 1. veðrétti. Því verður Íbúðalánasjóður að verja kröfu sína með þátttöku í nauðungarsölu ef síðari veðhafar óska eftir nauðungarsölu.
    Í októbermánuði hefur Íbúðalánasjóður frestað uppboðsmeðferð hjá einstaklingum og fjölskyldum í 58 skipti.
    Íbúðalánasjóður frestar ekki uppboðsmeðferð ef eigendur íbúða óska ekki eftir því, enda getur fjárhagsleg staða íbúðareigenda verið betur tryggð til lengri framtíðar með uppboðsmeðferð frekar en frestun uppboða. 
    Íbúðalánasjóður reynir ætíð að hafa samband símleiðis við viðkomandi aðila og kanna hvort viðkomandi vill reyna að leita þeirra úrræða sem í boði eru áður en nauðungarsala fer fram.
    Íbúðalánasjóður rekur einstaklinga og fjölskyldur ekki í gjaldþrot í kjölfar nauðungarsölu heldur fara eftirstæðar kröfur á biðreikning. 
    Íbúðalánasjóður býður þeim sem misst hafa eignir sínar á uppboði að greiða helming fjárhæðar útistandandi kröfu eftir uppboð og fá hinn helming kröfunnar felldan niður. Í kjölfar þess á viðkomandi rétt á nýrri lánveitingu frá Íbúðalánasjóði til kaupa á nýju húsnæði.
    Íbúðalánasjóður býður þeim einstaklingum og fjölskyldum sem misst hafa eignir sínar á uppboði að leigja húsnæðið til allt að 12 mánaða með möguleika á framlengingu.
    Ráðherra velferðarmála hefur lagt fram frumvarp sem kveður á um að þeir einstaklingar og þær fjölskyldur sem missa eignir sínar á uppboði geti gert samning um kaupleigu og þannig endurheimt íbúðarhúsnæði sitt.
Til baka