Algengar spurningar vegna heimildar Íbúðalánasjóðs til yfirtöku á lánum sem fjármálafyrirtæki hafa veitt gegn veði í íbúðarhúsnæði.

Spurt og svarað:

Hvaða vextir verða á lánum sem flytjast yfir til Íbúðalánasjóðs?

Svar: Gert er ráð fyrir því að lánin verði yfirtekin á óbreyttum kjörum.

Þarf ég að greiða lántökukostnað og stimpilgjöld að nýju við yfirtöku Íbúðalánasjóðs á láni mínu?

Svar: Nei.

Munu einstaklingar eiga kost á endurfjármögnunarláni hjá Íbúðalánasjóði til að greiða upp fasteignaveðlán hjá fjármálafyrirtæki sem ekki hefur verið yfirtekið af sjóðnum.

Svar: Að svo stöddu hefur ekki verið tekin afstaða til þess að hvaða marki slíkir lánamöguleikar verði í boði.

Er mögulegt að frysta lán sem er frá annarri lánastofnun ef þið yfirtakið lánið (t.d. vegna sölutregðu )? 

Svar: Ef Íbúðalánasjóður hefur yfirtekið íbúðalán hefur lántakandi sömu stöðu og aðrir viðskiptavinir Íbúðalánasjóðs og eiga því kost á þeim greiðsluerfiðleikaúrræðum sem viðskiptavinum sjóðsins standa til boða með sömu skilyrðum, m.a. um frystingu lána. 

Frá hvaða fjármálastofnunum verða lán yfirtekin? 

Svar: Ekki liggur fyrir nú frá hvaða lánastofnunum íbúðalán verða yfirtekin en ljóst er að frumkvæði að yfirtöku lána verður að koma frá forráðamönnum viðkomandi fjármálafyrirtækja

Hefur viðskiptavinur val um hvort lán hans er yfirtekið af Íbúðalánasjóði? 

Svar: Nei, ákvörðun um yfirfærslu íbúðalána er óháð samþykki skuldara. 

Stöðvast uppboðsmeðferð þegar Íbúðalánasjóður hefur yfirtekið lán frá banka og fá skuldarar þá skuldbreytingu?

Svar: Uppboðsmeðferð stöðvast ekki sjálfkrafa við yfirtöku Íbúðalánasjóðs á láni. Ef uppboðsmeðferð er í gangi þegar lán er yfirtekið þarf lántakandi að hafa samband við Íbúðalánasjóð og leita samninga vegna greiðsluerfiðleika.  

Get ég fengið fyrirgreiðslu hjá Íbúðalánasjóði vegna bílaláns sem er komið í þrot? 

Svar: Nei. Heimildir Íbúðalánasjóðs ná ekki til yfirtöku á bílalánum heldur eingöngu á lánum sem tryggð eru með veði í íbúðarhúsnæði.

Með hvaða hætti verða gengistryggð lán yfirtekin? 

Svar: Gengistryggð lán verða, með sama hætti og lán í íslenskum krónum, yfirtekin á sömu kjörum og með sömu skilmálum og þau eru með hjá viðkomandi fjármálafyrirræki. Í þessu felst m.a. að erlent lán verður yfirtekið á því gengi sem það er á við yfirtökuna. Skuldbinding lántakanda verður þá jafnframt áfram í erlendri mynt.  

Er heimilt að greiða umframgreiðslur eða greiða upp lán hjá Íbúðalánasjóði? 

Svar: Já, en greiða þarf uppgreiðslugjald ef mælt er fyrir um slíkt í skilmálum lánsins.