Verðbréfaútgáfa

Íbúðalánasjóður gefur út og selur markaðsverðbréf í þeim tilgangi að fjármagna útlánastarfsemi sína og til að ná fjárhagslegum jöfnuði í fjárhagslegri stöðu sinni og rekstri. Verðbréfaútgáfa hefur tekið breytingum í kjölfar breyttra aðstæðna sjóðsins og forvera hans, Húsnæðisstofnunar ríkisins og þeirra laga sem hann starfar eftir. Úgáfa og sala markaðsverðbréfa hófst 1989 í tíð Húsnæðisstofnunar ríkisins þegar húsbréfakerfið var stofnað, en fljótlega eftir það voru húsnæðisbréfin gefin út í þeim tilgangi að endurfjármagna eldri skuldbindingar Húsnæðisstofnunar. Þessi verðbréfaútgáfa hélt áfram óbreytt allt til loka júní 2004 en þá var hætt útgáfu nýrra bréfa í þessum flokkum og í stað þess farið að gefa út og selja íbúðabréf til að fjármagna starfsemina.
Álit nefndar um endurskipulagningu verðbréfaútgáfu Íbúðalánasjóðs 2003 (pdf.)


Þegar hús- og húsnæðisbréfaflokkarnir voru upphaflega gefnir út var rafræn eignarskráning verðbréfa ekki komin til á Íslandi og voru bréfin því gefin út í pappírsformi. Bæði húsbréfin og húsnæðisbréfin voru skráð á opinberum verðbréfamarkaði, þá Verðbréfaþing Íslands hf. sem í dag ber nafnið Kauphöll Íslands hf. og eru þau enn skráð á þeim markaði. Á árinu 2001 voru gefnir út tveir flokkar húsbréfa, 1. flokkur 2001 (IBH26 0316, ISIN code IS0000004927) og 2. flokkur 2001 (IBH41 0315, ISIN code IS0000004935) sem voru alfarið gefnir út í rafrænu formi og voru þeir eignarskráðir hjá Verðbréfaskráningu Íslands hf. Í kjölfar útgáfu þessara flokka var ákveðið að bjóða eigendum bréfa í ákveðnum þegar útgefnum flokkum hús- og húsnæðisbréfa að rafrænt eignarskrá þá hjá Verðbréfaskráningu Íslands hf. Þeir flokkar sem hér um ræðir voru 2. flokkur húsbréfa 1996 (IBH21 0115, ISIN code IS0000001063), 1. flokkur húsbréfa 1998 (IBH22 1215, ISIN code IS0000001071), 2. flokkur húsbréfa 1998 (IBH37 1215, ISIN code IS0000001097), 1. flokkur húsnæðisbréfa 1996 (IBN20 0101, ISIN code IS0000001154) og 2. flokkur húsnæðisbréfa 1996 (IBN38 0101, ISIN code IS0000001162). Í árslok 2003 voru þessir flokkar síðan teknir til skráningar í Clearstream sem er alþjóðleg eignarskráningar- og uppgjörsmiðstöð, sem gerði það að verkum að erlendir fjárfestar gátu fest kaup á bréfunum, en skráning bréfa í slíkum alþjóðlegum skáningarmiðstöðum er forsenda þess að erlendir fjárfestar festi kaup á verðbréfum.


Þann 1. júlí 2004 varð alger breyting á verðbréfaútgáfu Íbúðalánasjóðs. Var þá hætt útgáfu tveggja tegunda verðbréfa þ.e. hús- og húsnæðisbréfa og þess í stað hafin útgáfa einnar tegundar þ.e. íbúðabréfa. Í upphafi voru gefnir út þrír flokkar íbúðabréfa HFF150224 (ISIN code XS0195066146), HFF150434 (ISIN code XS0195066575) og HFF150644 ISIN code XS0195066658). Til þess að efla markaðsstöðu þessara flokka var strax ákveðið að gefa eigendum bréfa í þeim flokkum hús- og húsnæðisbréfa, sem voru rafrænt eignarskráðir, tækifæri til að skipta á þeim bréfum og hinum nýju íbúðabréfum. Voru undirtektir eigenda góðar og voru 80 - 84% af húsnæðisbréfunum og 85% - 98% í rafrænu húsbréfaflokkunum skipt fyrir hin nýju Íbúðabréf. Urðu því nýju flokkarnir strax mjög markaðshæfir. Í nóvember 2004 var síðan bætt við nýjum flokki íbúðabréfa HFF150914 (ISIN code XS0205348427). Allir íbúðabréfaflokkarnir eru skráðir á opinberum verðbréfamakraði hjá Kauphöll Íslands hf. og eru þar að auki eignarskráð í Euroclear sem er alþjóðleg eignarskáningar- og uppgjörsmiðstöð.


Unnið hefur verið að því skipulega að gera upplýsingar og aðgengi að íbúðabréfum sem aðgengilegast fyrir alþjóðlega fjárfesta. Auk þess sem hægt er að nálgast upplýsingar um ibúðabréfin á heimasíðu Kauphallarinnar hefur Íbúðalánasjóður opnað heimasíðu á Bloomberg þar sem hægt er að nálgast upplýsingar um bréfin og viðskipti með þau. Fyrir þá sem hafa aðgang að Bloomberg er einkenni heimasíðu Íbúðalánasjóðs HFFI.
Til baka