Lán til endurbóta

Endurbætur – leiguíbúðir

Nýr lánaflokkur sem heimilar lán til félaga, félagasamtaka og sveitarfélaga vegna endurbóta og viðhalds á leiguíbúðum sem þau reka til útleigu tryggir þessum aðilum sambærilega lánafyrirgreiðslu til endurbóta á leiguíbúðum og einstaklingar eiga kost á vegna eigin íbúðarhúsnæðis.

Reglugerð um lánaflokka Íbúðalánasjóðs nr. 57/2009

Ætla má að þessi lánamöguleiki geti skapað svigrúm til framkvæmda og þar með aukna atvinnu í byggingariðnaði, til dæmis ef sveitarfélög vilja nýta slík lán til viðhalds á leiguíbúðum sínum.

Lánin eru til 50 ára en eru aldrei með niðurgreiddum vöxtum þó fyrri lán viðkomandi félags hafi verið á niðurgreiddum vöxtum.

Umsóknir skulu berast skriflega til Íbúðalánasjóðs

Skilyrði

Skilyrði lánveitingar er að íbúðareigandi hafi áður en framkvæmdir hefjast fengið vilyrði Íbúðalánasjóðs fyrir láni. Lánsvilyrði Íbúðalánasjóðs skal veitt á grundvelli áætlunar um umfang verksins, kostnað og verklok.

Lán verður ekki afgreitt fyrr en framkvæmdum er lokið og eigi síðar en sex mánuðir eru liðnir frá lokum þeirra.

Íbúðareigandi skal leggja fram staðfestingu frá byggingarfulltrúa og arkitekta-, tæknifræði- eða verkfræðistofu um umfang og kostnað framkvæmda, eðli þeirra og verklok.

Íbúðalánasjóður getur kallað eftir frekari staðfestingu eða falið sérstökum trúnaðarmönnum að meta kostnað endurbóta og byggt á því mati.

Hámarkslánshlutfall og fjárhæðir

Fjárhæð láns samkvæmt þessum kafla skal ásamt öllum uppfærðum framar áhvílandi lánum rúmast innan hámarkslánshlutfalls viðkomandi leiguíbúðalána af hámarksverði íbúðar samkvæmt reglugerð nr. 873/2001, um lánveitingar til leiguíbúða, ráðstöfun þeirra og rekstur, eða samkvæmt nánari ákvörðun og takmörkunum samkvæmt reglum sem stjórn Íbúðalánasjóðs kann að setja.

Íbúðalánasjóður synjar umsækjanda um lánveitingu ef umsækjandi hefur ekki lagt fram tilskilin gögn þrátt fyrir leiðbeiningar, verulegur munur er á áætluðum kostnaði endurbóta og kostnaði við verklok eða ef framkvæmd er án tilskilinna leyfa samkvæmt lögum. Sama gildir ef framkvæmd fellur ekki að öðru leyti að heimildum og skilyrðum sem sett eru.

Til baka