Frestun afborgana
Reglur um frestun aborgana leiguíbúðalána
Heimilt verður að fresta afborgunum leiguíbúðalána að hluta þannig:
- Frestun verði heimil aftur að síðasta ógreidda gjalddaga þannig að áfallnir dráttarvextir falla niður en leiguíbúðafélag þarf að greiða í einni greiðslu áfallinn innheimtukostnað útlagðan af Íbúðalánasjóði (ÍLS).
- Heimild er til frestunar í eitt ár frá afgreiðslu umsóknar, heimild til framlengingar um eitt ár.
- Leigufélag skuldbindur sig til að greiða til ÍLS 65% af mánaðarlegum afborgunum til ÍLS vegna lána hverrar íbúðar sem er í útleigu, eða 65% af leigutekjum, eftir því hvort lægra er. Fjárhæðin verður uppfærð mánaðarlega í samræmi við útreiknaðan gjalddaga hverju sinni ef um er að ræða 65% af afborgunum en ársfjórðungslega m.v. vísitölu neysluverðs ef um er að ræða 65% af leigutekjum.
- Við lok frestunar verða áfallnir vextir lagðir við höfuðstól og innheimta láns sett í gang aftur.
- Verði greiðslufall á hlutagreiðslu til ÍLS verður frestun strax afnumin og innheimtuferli sett í gang að nýju.
Heimilt verður að fresta afborgunum leiguíbúðalána að fullu þannig:
- Heimilt verður að fresta afborgunum á auðum leiguíbúðum leigufélags til sex mánaða í senn án hlutagreiðslu.
- Fjöldi auðra leiguíbúða leigufélags sem heimilt er að fá frestun á án hlutagreiðslu má þó ekki vera yfir 50% af heildarfjölda leiguíbúða viðkomandi leigufélags.
- Við lok frestunar verða áfallnir vextir lagðir við höfuðstól og innheimta láns sett í gang aftur.
Aðrar almennar reglur um heimild til frestunar gilda um bæði tilvik:
- Greiðsluvandinn skal vera tímabundinn.
- Greinargerð um eðli greiðsluvandans og orsök hans og á hvern hátt frestun á greiðslum lána sé þáttur í heildarlausn vandans skal fylgja með umsókn.
- Skilyrði frestunar er að greiðsluvandi sé tilkominn vegna ófyrirséðra atvika eða vegna endurskipulagningar á fjárhag leigufélags enda þyki slík aðstoð líkleg til að leysa greiðsluvanda.
- Samþykki Íbúðalánasjóður frestun á greiðslum skal skilmálabreyting vegna frestunarinnar gerð með viðauka við það skuldabréf sem greiðslum er frestað á. Viðaukanum skal þinglýst og tekur frestunin gildi þegar þinglýst skjal hefur borist Íbúðalánasjóði.
- Heimilt er að fresta afborgunum af lánum í allt að 3 ár. Þegar afborgunum er frestað bætast áfallnir vextir við höfuðstól lánsins. Lánstími lengist sem nemur frestunartíma. Að frestun lokinni reiknast ný jafngreiðsla (annuitet).
Eftirfarandi gögn þurfa alltaf að fylgja umsókn um frestun á greiðslum: - Greinargerð fyrirtækis þar sem vandi og ástæður vanda eru skilgreindar og gerð grein fyrir leiðum sem fyrirtækið hyggst fara til að leysa vandann.
- Rekstraráætlun unnin af viðskiptafræðingi eða til þess bærum aðila þar sem fram koma forsendur rekstrar á næstu árum. Rekstraráætlun þarf að sýna að félag muni geta staðið í skilum að frestunartíma loknum.
- Heildaryfirlit eigna og skulda. – Nauðsynlegt er að listi fylgi yfir íbúðir í eigu félags ásamt upplýsingum um stærð íbúðar, fasteignamat, verðmat og uppreiknaða stöðu áhvílandi skulda.
- Síðasti ársreikningur félags staðfestur af löggiltum endurskoðanda.
- Önnur gögn sem Íbúðalánasjóður telur nauðsynleg til að unnt sé að taka afstöðu til umsóknar.
- Lagt skal mat á hvort svigrúm er fyrir frestun samkvæmt verðmæti eignar og því getur verið nauðsynlegt að kalla eftir verðmati fyrir þær eignir sem standa til tryggingar lánum sem sótt er um frestun á.
Greinargerð
Tilgangur heimildar ÍLS til að fresta afborgunum leiguíbúðalána með þessum hætti er að veita leiguíbúðafélögum tækifæri til að endurskipuleggja rekstur sinn og að koma í veg fyrir að mikill fjöldi leiguíbúða fari í nauðungarsölumeðferð og endi sem uppboðseignir Íbúðalánasjóðs. Hlutfall lánveitinga til leiguíbúða var 90% en er nú 80%. Ljóst er að með mikilli verðbólgu síðustu mánuði og spám um lækkandi fasteignaverð er ljóst að áhætta Íbúðalánasjóðs mun aukast við frestun. Á það verður hins vegar að líta að í ljósi efnahagsástands má gera ráð fyrir auknum vanskilum leiguíbúðafélaga ef ekkert verður að gert.
Til baka