Almenn leiguíbúðalán

Almenn leiguíbúðalán

Íbúðalánasjóði er heimilt að veita sveitarfélögum, félögum og félagasamtökum, (sem hlotið hafa samþykki Velferðarráðuneytis) þ. á. m. húsnæðissamvinnufélögum, lán til byggingar eða kaupa á leiguíbúðum til útleigu fyrir félagsmenn í hlutaðeigandi félögum eða félagasamtökum eða aðra leigjendur hjá slíku félagi. Umsækjendur geta sótt um þegar þeir hafa fengið vilyrði fyrir lóð eða gert tilboð í eign til kaups. Heimild til lána úr þessum lánaflokki er ákvörðuð í fjárlögum hvers árs.

Félög geta fengið tvenns konar lán til leiguíbúða:

• Lán til almennra leiguíbúða
• Lán til félagslegra leiguíbúða, háð tekju- og eignamörkum

Stjórn Íbúðalánasjóðs hefur á undanförnum mánuðum látið gera úttekt á íbúðabyggingum og stöðu húsnæðismarkaðar í flestum stærstu byggðakjörnum landsins. Niðurstaða þeirrar könnunar leiðir í ljós að nokkuð víða standi nú íbúðabyggingar sem hætta er á að ekki seljist eða nýtist sem leiguhúsnæði á næstu mánuðum, jafnvel misserum. Það er því niðurstaða stjórnar sjóðsins að nauðsynlegt sé að fara með gát við veitingu lánsvilyrða vegna leiguíbúða á næstunni.



Lánskjör

Veitt eru jafngreiðslulán til allt að því 50 ára með breytilegum eða föstum vöxtum. Þau eru að fullu verðtryggð og höfuðstóll þeirra miðast við vísitölu neysluverðs eins og hún er á hverjum tíma. Lánin eru tryggð með veði í húsnæðinu.

 

Vextir

• Lán með breytilegum vöxtum, nú 4,85%. Stjórn Íbúðalánasjóðs tekur ákvörðun um breytingu á vöxtunum einu sinni á ári.
• Lán sem veitt eru án heimildar til uppgreiðslu nema gegn þóknun, nú með 4,20% vöxtum.
• Lán sem hægt er að greiða upp hvenær sem er án þóknunar, nú með 4,70% vöxtum.
  
   
  

Lánsupphæð

• Allt að 80% af byggingarkostnaði eða kaupverði íbúðar
• Aldrei hærri en 80% af hámarksverði íbúða, samkvæmt reglum Íbúðalánasjóðs.

Auk þess er hægt að fá lánað út á fjármagnskostnað vegna byggingar leiguíbúða samkvæmt  stjórnar Íbúðalánasjóðs.

Um ákvörðun byggingarkostnaðar fer eftir V. kafla reglugerðar nr. 873/2001 um lánveitingar til leiguíbúða, ráðstöfun þeirra og rekstur, og samkvæmt nánari ákvörðun stjórnar Íbúðalánasjóðs.

Stjórn Íbúðalánasjóðs ákveður lánshlutfallið hverju sinni að teknu tilliti til fjölda umsókna og þess fjármagns sem til ráðstöfunar er hverju sinni.

Lán sem veitt eru samkvæmt þessum kafla koma til útborgunar:

• Nýbyggingar: Þegar framkvæmdum er lokið og Íbúðalánasjóður hefur gert úttekt á þeim.
• Notað húsnæði: Þegar íbúðir koma til afhendingar samkvæmt kaupsamningi.

Við ákvörðun lánsfjárhæðar skal taka tillit til fjármagns frá opinberum aðilum, þ. á. m. úr ríkissjóði, til hlutaðeigandi framkvæmda þannig að lán úr Íbúðalánasjóði og annað fjármagn verði samanlagt aldrei hærra en af kaupverði eða byggingarkostnaði.



Staðfesting velferðarráðherra

Félög sem hafa þann tilgang að byggja, eiga og reka leiguíbúðir, geta fengið lán til að fjármagna íbúðakaup, samkvæmt VIII. kafla laga um húsnæðismál nr. 44/1998.

Áður en félögin eru skráð og hefja starfsemi sína þurfa þau og samþykktir þeirra að hafa hlotið staðfestingu velferðarráðherra, sbr. 33. gr. laganna.

Ráðuneytið hefur gefið út leiðbeiningar um hvernig samþykktum skal háttað.

Ákvæði samþykkta félagsins og rekstur þess þarf að vera í samræmi við VIII. kafla laga um húsnæðismál nr. 44/1998, reglugerð um lánveitingar til leiguíbúða, ráðstöfun þeirra og rekstur, nr. 873/2001 og VIII. kafla reglugerðar um lánaflokka Íbúðalánasjóðs nr. 458/1999 sbr. reglugerð nr. 1000/2001 með áorðnum breytingum.

Lánsumsóknir

Þegar sveitarfélög, félög eða félagasamtök hafa fengið vilyrði fyrir lóð eða gert tilboð í eign til kaups sækja þau um lán til Íbúðalánasjóðs.





Eigið framlag og afgreiðsla lánsumsókna

Umsækjendur eiga, við lánsumsókn hjá Íbúðalánasjóði, að sýna fram á að þeir hafi fjárhagslegt bolmagn til þess að greiða þann hluta af byggingarkostnaði eða kaupverði íbúðar sem ekki fæst lánað til. Við lánsafgreiðslu þarf því til staðfestingar að leggja fram ábyrgð af hálfu fjármálastofnunar eða annað sem Íbúðalánasjóður metur gilt s.s. upplýsingar um eiginfjárstöðu, innborgun á hlutafé o.fl.

Íbúðalánasjóður hefur heimild til að afturkalla veitt lánsvilyrði ef verulegar breytingar verða á upphaflegum forsendum sem lágu til grundvallar lánsvilyrði sjóðsins. Sem dæmi um slíkar breytingar á forsendum má nefna þegar framkvæmdir dragast mjög á langinn eða ef verulegar breytingar verða á eignarhaldi félags sem fengið hefur lánsvilyrði.  Sjá nánar hér: Reglur um umsókn og afgreiðslu leiguíbúðalána

Takmarkanir

Óheimilt er að hafa eigendaskipti á íbúð sem á hvílir lán sem veitt hefur verið skv. þessum kafla nema lán sé annað hvort greitt upp eða Íbúðalánasjóður samþykki yfirtökuna.

Félag og félagasamtök sem ráðstafa leiguíbúð bera eftir sem áður fulla ábyrgð á láninu sem veitt var af Íbúðalánasjóði.

Sé rekstri félags hætt, tilgangi þess breytt eða íbúðarhúsnæði sem lánað er til er tekið undir annan rekstur skal áhvílandi lán Íbúðalánasjóðs greitt upp. Þinglýsa skal kvöð þess efnis á íbúðina samhliða þinglýsingu lánsins.

Tilkynna skal Íbúðalánasjóði um breytingar á tilgangi félags eða ef rekstri þess er hætt án ástæðulausrar tafar.

Krafa er að þinglýstir leigusamningir liggi fyrir áður en lán er afgreitt. Stjórn Íbúðalánsjóðs er þó heimilt að veita undanþágu frá þessari reglu þegar um er að ræða félög sem hafa verið lengi starfandi og þykja gegna mikilvægu félagslegu hlutverki, svo sem félög sem reka leiguíbúðir fyrir aldraða eða námsmenn.