Lán til nýbygginga/íbúða í smíðum

Landsmenn hafa sama rétt til að taka lán hjá Íbúðalánasjóði, óháð búsetu.

• Íbúðalánasjóður lánar allt að 20 milljónir til nýbygginga. Lán á fyrri veðréttum dragast frá hámarkslánsfjárhæðinni.
• Einstaklingar  fá lánað út á  80% af byggingarkostnaði allt frá því að íbúð er orðin fokheld og þar til hámarksláni er náð, oftast við endanlegt brunabótamat eignarinnar.
• Byggingarkostnaður er sama sem endurstofnverð íbúða að viðbættu lóðarmati.
• Hver og einn má aðeins eiga eina íbúð með áhvílandi láni frá Íbúðalánasjóði.
  Ef umsækjandi um lán á íbúð fyrir með áhvílandi láni frá sjóðnum skuldbindur hann sig til að selja hana innan 12 mánaða. Annars verður lánið gjaldfellt. 
• Íbúðin verður að vera til eigin nota. 

Með bráðabirgðamati er hægt að fá vísbendingu um kaupgetu. Einnig er hægt að gera endanlegt greiðslumat á Íbúðalán.is.

Einstaklingar gera greiðslumat og senda inn umsókn þegar eignin er orðin fokheld og endurstofnsverð komið á.
Hafi greiðslumat verið gert meira en tveimur mánuðum áður en umsókn á að sendast inn þarf að endurnýja það.
Byggingarkostnaður sem lánað er út á er fundinn skv. opinberum upplýsingum um byggingarkostnað hjá Fasteignaskrá Íslands og liggur fyrst fyrir þegar fokheldisstigi er náð, um leið og fasteignamat kemur á eignina.

Lán út á nýbyggingu eru veitt í allt að fimm ár frá því bygging er fokheld, en þó ekki eftir að eitt ár er liðið frá því að eignin var fullbúin og komið á hana endanlegt brunabótamat.

Hvað er viðauki?

Allar viðbætur við íbúð, hvort sem þær eru keyptar eða byggðar, eru lánshæfar ef þær hafa hlotið samþykki byggingaryfirvalda og ef þær eru skráðar með íbúðinni í fasteignaskrá og veðmálabókum.
Ef viðauki er byggður þarf hann að vera fullbúinn þegar lánið er veitt. Ekki er lánað til byggðs viðauka skv. kostnaðaryfirliti, heldur er lánið ákveðin prósenta af byggingarkostnaði Fasteignaskrár Íslands.

Yfirtaka á eldri lánum ef keypt er íbúð í smíðum

Hugsanlega er hægt að yfirtaka eldri lán ef keypt er íbúð í smíðum. Kjör eldri lána koma fram á söluyfirliti hjá fasteignasala. Með reiknivélinni Samanburður lána/Yfirtaka er einfalt að reikna út hvort hagstætt er að yfirtaka eldri lán á eign. Af eldri lánum þarf ekki að greiða lántöku- og stimpilgjöld (2,5%).

Ef kaupandi er þegar með lán hjá sjóðnum býðst honum að flytja það á eignina sem verið er að kaupa. Sjá reglur um veðlánaflutninga.

Fylgigögn með umsókn um lán til nýbyggingar eða íbúðar í smíðum:

• Staðfesting á smíðatryggingu vátryggingafélags

Ef við á: 

• Umboð 
• Síðustu greiðsluseðlar áhvílandi lána annarra en Íbúðalánasjóðs sem eiga að vera framar í veðröð en lánið sem sótt er um
• Staðfesting á fjárhæð og lánskjörum nýrra lána sem skulu vera framar í veðröð en lán Íbúðalánasjóðs 
• Samþykki yfirlögráðanda ef kaupandi eða seljandi er ekki lögráða 
• Við skilnað / sambúðarslit: 
  • Hjón: Fjárskiptasamningur um skilnað að borði og sæng, staðfestur af sýslumanni 
  • Fólk í sambúð: Fjárskiptasamningur undirritaður af báðum aðilum og vottaður

Íbúðalánasjóður getur einnig óskað eftir verðmati löggilts fasteignasala á markaðsverði íbúðarinnar eftir endurbætur eða viðauka og má leggja það mat til grundvallar lánveitingunni skv. reglugerð nr. 522/2004 um ÍLS-veðbréf og íbúðabréf.

Ef veita á umboð skal koma fram að um umboð sé að ræða, hverjar heimildir umboðið veiti, það sé dagsett og vottað af tveimur aðilum. Óskað er eftir frumriti umboðsins eða staðfestu afriti af þinglýstu umboði.

Íbúðalánasjóður getur óskað eftir fleiri gögnum en hér eru tilgreind.

 

Til baka