Lán til endurbóta og viðbygginga
Lánað er til endurbóta og viðauka á sömu kjörum og bjóðast við kaup eða byggingu fasteigna eftir að framkvæmdum hefur verið lokið.
- Hámarkslán er 20 milljónir*
- Lánað er fyrir allt að 80% af heildarkostnaði
- Lánstími getur verið 5, 10, 15, 20, 30 eða 40 ár
- Sömu vaxtakjör og á almennum íbúðalánum
Skilyrði fyrir lánveitingu eru að:
- 10 ár séu frá því að fasteignin varð fokheld
- Lánsfjárhæð sé að lágmarki 400.000 þúsund krónur, þ.e. framkvæmdakostnaður að lágmarki 500 þúsund krónur
- Ekki mega vera liðnir meira en 12 mánuðir frá lokum endurbóta
*Að nýju láni meðtöldu mega lán sem hvíla á fyrri veðréttum ekki vera umfram 20 milljónir samtals.
Dæmi: Ef áhvílandi lán eignar eru 13 milljónir getur nýtt lán vegna endurbóta ekki orðið hærra en 7 milljónir.
Sótt er um lán til endurbóta eða viðauka þegar framkvæmdum/kaupum er að fullu lokið. Jafnframt þarf að senda staðfestingu á umfangi, framkvæmdakostnaði og verklokum endurbóta t.d. kostnaðaryfirlit ÍLS) og önnur nauðsynleg fylgigögn til Íbúðalánasjóðs (sjá neðar).
Þrátt fyrir þessi skilyrði er heimilt að veita lánið áður en framkvæmdir hefjast eða meðan á þeim stendur og þá gegn áætlun um umfang og kostnað framkvæmda, eðli þeirra og verklok sem staðfest er af byggingarfulltrúa eða öðrum leyfishöfum, eða gegn framvísun kaupsamnings ef um kaup er að ræða. Heimild Íbúðalánasjóðs til að afgreiða lánið áður en framkvæmdum er lokið er háð veðhæfni íbúðar samkvæmt almennum reglum sjóðsins, að teknu tilliti til framkvæmdanna, veðsetning takmarkast af fasteignamati þar til staðfest hefur verið að framkvæmdum sé lokið. Eins þarf að skila inn ábyrgð fjármálastofnunar fyrir láninu sem fellur úr gildi þegar staðfest lok framkvæmda liggja fyrir. Ábyrgðin er gefin út af Íbúðalánasjóði en samþykkt af viðskiptabanka umsækjanda. Ábyrgðin er felld niður þegar verklok hafa verið staðfest að því tilskyldu að kostnaður sé í samræmi við þá áætlun sem lögð var fram.
Hvað telst til endurbóta?
Lánshæfar eru hvers kyns endurbætur á fasteigninni hvort sem er utanhúss eða innan. Til endurbóta getur t.d. talist endurnýjun á raf- og/eða vatnslögnum, þakviðgerðir, málningarvinna, endurnýjun eldhúsinnréttinga og margt fleira. Lóðarframkvæmdir eru einnig lánshæfar, t.d. vegna hellulagnar og smíði sólpalla.
Hvað er viðauki?
Allar viðbætur við íbúð, hvort sem þær eru keyptar eða byggðar, eru lánshæfar ef þær hafa hlotið samþykki byggingaryfirvalda og ef þær eru skráðar með íbúðinni í fasteignaskrá og veðmálabókum.
Ef viðauki er keyptur er kauptilboði og öðrum nauðsynlegum fylgigögnum skilað til Íbúðalánasjóðs þegar kaupin hafa gengið í gegn og búið er að skrá viðaukann með íbúðinni bæði í fasteignaskrá og veðbók.
Ef viðauki er byggður þarf hann að vera fullbúinn þegar lánið er veitt. Ekki er lánað til byggðs viðauka skv. kostnaðaryfirliti, heldur er lánið ákveðin prósenta af byggingarkostnaði skv. Fasteignaskrá Íslands.
Hverjir geta staðfest kostnað og verklok?
Aðilar með leyfi frá iðnaðarráðuneytinu, t.d. byggingarfulltrúar, byggingafræðingar, arkitekta-, tæknifræði- eða verkfræðistofur, geta staðfest að umfang framkvæmda samkvæmt kostnaðaryfirliti sé eðlilegt og að verkinu sé lokið.
Fylgigögn með umsókn um íbúðalán vegna endurbóta:
- Greiðslumat og viðeigandi umsókn.
- Framkvæmdakostnaður endurbóta: Staðfesting á umfangi framkvæmda, eðli þeirra og verklokum. Framkvæmdakostnaður þarf að vera staðfestur af ofangreindum aðilum.
- Vottorð byggingarfulltrúa um samþykki byggingarnefndateikninga (ef um breytingar á húsnæðinu er að ræða) ásamt stærðartöflu eignarinnar. Íbúðalánasjóði er heimilt að óska eftir gögnum og afriti af samþykktum byggingarnefndateikningum ef á þarf að halda.
Fylgigögn með umsókn um íbúðalán vegna byggðs viðauka:
Greiðslumat og viðeigandi umsókn.
Fylgigögn með umsókn um íbúðalán vegna keypts viðauka:
- Greiðslumat og viðeigandi umsókn.
- Kauptilboð (kauptilboð, staðfest af fasteignasala, má faxa í númerið 569-6800).
Ef við á:
- Umboð
- Síðustu greiðsluseðlar áhvílandi lána annarra en Íbúðalánasjóðs sem eiga að vera framar í veðröð en lánið sem sótt er um
- Staðfesting á fjárhæð og lánskjörum nýrra lána sem skulu vera framar í veðröð en lán Íbúðalánasjóðs
- Samþykki yfirlögráðanda ef kaupandi eða seljandi er ekki lögráða
- Við skilnað / sambúðarslit:
- Hjón: Fjárskiptasamningur um skilnað að borði og sæng, staðfestur af sýslumanni
- Fólk í sambúð: Fjárskiptasamningur undirritaður af báðum aðilum og vottaður
Ef veita á umboð skal koma fram að um umboð sé að ræða, hverjar heimildir umboðið veiti, það sé dagsett og vottað af tveimur aðilum. Óskað er eftir frumriti umboðsins eða staðfestu afriti af þinglýstu umboði.
Íbúðalánasjóður getur óskað eftir fleiri gögnum en hér eru tilgreind.
Til baka