Frágangur ÍLS veðbréfs

Mjög mikilvægt er að leiðbeiningum um frágang ÍLS-veðbréfa sé fylgt nákvæmlega. Viðskiptavinir Íbúðalánasjóðs eru hvattir til að kynna sér eftirfarandi gaumgæfilega.

Undirritun
Allir skuldarar og þinglýstir eigendur fasteignar þurfa að undirrita ÍLS-veðbréfið. Séu þeir í hjúskap eða staðfestri samvist þurfa báðir aðilar að undirrita bréfið.

ÍLS-veðbréfið þarf að vera staðsett, dagsett og tvívottað. Vottar þurfa að rita nafn sitt og kennitölu. Vottun löggilts fasteignasala, héraðsdóms- eða hæstaréttarlögmanns gildir sem tvívottun. Við nafnið þarf að standa hdl., hrl. eða löggiltur (lögg.) fasteignasali.

Þegar ritað er á ÍLS-veðbréf eftir umboði þarf umboðsmaður að rita nafn sitt og á eftir því orðin"eftir umboði", skammstafað "e.u." Ef umboðsmaður er einnig skuldari bréfs og þarf þar af leiðandi einnig að undirrita það sjálfur, ætti hann að rita nafn sitt og þar fyrir aftan "fyrir mína hönd og fyrir hönd [nafn] e.u."

Séu undirritanir fyrir hönd fyrirtækis þarf að auðkenna þær með f.h. og helst stimpli fyrirtækis og orðunum "fyrir hönd" og nafni fyrirtækisins. Sá sem undirritar fyrir hönd fyrirtækisins þarf að hafa rétt til selja og veðsetja fasteignir fyrirtækisins.

Ráðstöfun ÍLS-veðbréfs staðfest
Skuldari og þinglýstur eigandi íbúðar staðfesta ráðstöfun ÍLS-veðbréfs með undirritun sinni. Ef um er að ræða kaup á notuðu húsnæði koma kaupandi og seljandi sér saman um ráðstöfun veðbréfsins með undirritun ráðstöfunar. Ef um nýbyggingu eða endurbætur er að ræða staðfestir lántaki sjálfur ráðstöfunina.

Ef um er að ræða fyrirtæki, sveitarfélög eða aðra lögaðila þurfa fjármunirnir að fara á reikning í eigu lögaðilans.

Þinglýsing
Bréfinu skal þinglýst hjá sýslumanni þess umdæmis sem fasteignin er í.
Sýslumaður fær tvö eintök af bréfinu, frumrit og afrit á löggiltan skjalapappír.
Stimpilgjald er 1,5% nema við kaup á fyrstu íbúð þá þarf ekki að greiða stimpilgjald. Gjald vegna þinglýsingar hvers skjals er 1.350 kr.
Þinglýsing verður að vera án athugasemda. Íbúðalánasjóður kaupir ekki veðskuldabréf sem er þinglýst með athugasemd.

Andvirði ÍLS-veðbréfs ráðstafað inn á bankareikning
Þegar ÍLS-veðbréfi hefur verið þinglýst á umsaminn veðrétt samkvæmt kauptilboði afhendir lántaki eða umboðsmaður hans Íbúðalánasjóði þinglýst frumrit ÍLS-veðbréfsins ásamt þinglýstum kaupsamningi eignarinnar.

Andvirði bréfsins sem ráðstafað er, er alltaf fjárhæð skuldabréfsins að frádregnu lántökugjaldi hvort sem því er ráðstafað fimm dögum eftir útgáfu eða síðar. Útborgunarupphæð ber ekki vexti og verðbætur eftir fyrsta vaxtadag.

Andvirði ÍLS-veðbréfsins er síðan lagt inn á bankareikning þann sem vísað er til á bréfinu sjálfu. Þetta gerist í lok þess dags sem Íbúðalánasjóður kaupir bréfið en þó ekki fyrr en á fyrsta vaxtadegi þess eða fimm dögum frá afgreiðslu bréfsins hjá Íbúðalánasjóði.
Til baka